Монголын үндэсний дээд лигийн аварга шалгаруулах тэмцээнд легионер Гантогтохын Хандсүрэнг оруулахгүй гэжээ

Монголын үндэсний дээд лигийн аварга шалгаруулах тэмцээний тойргий тоглолтууд үргэлжилж байна.

Энэ жилийн дээд лигт Г.Хандсүрэнг тоглуулахгүй шийдвэр гарсан нь түүний фенүүдийг багагүй бухимдуулаад байна.

Энэ тухай Г.Хандсүрэн өөрийн фэйсбүүк хуудсаараа мэдээлэл хийжээ.

” Волейболын холбоо, клуб хоёрын дунд үл ойлголцол үүссэн бөгөөд  үүнээс болж  миний бие энэ жилийн лигийг өнжихөөр болсон. ITC буюу International Transfer Certificate гэж байгаа. Би үүнийг гурван удаа авсан. Энэ сертификат нь олон улсад тоглох боломжтой ямар нэг асуудалгүй, гэмт хэрэгт холбогдож байгаагүй тамирчин хүн  гэдгийг баталж тухайн тамирчинд дугаар олгодог.  ITC-г авсан хүнийг легионер тамирчин гэж ойлгож болно. Үүнийг ойлгохгүй байна.

Ховд “Ижил Алтайн Барс” гэдэг клубтэй монгол легионероор тоглох боломжтой гэдэг яриа клуб болоод холбоо хоёрын дунд гарсан. Яагаад холбооноос Монгол легионер гэдэг нэршил гаргах болсныг би ойлгоогүй. Гэхдээ би ITC авсан тамирчин учраас легионер тамирчинтай ижил түвшинд байгаа. Монголд ирж байгаа легионертэй адилхан түвшинд гадагшаа очдог легионер нь би. Тэр сертификат нь байгаа болохоор тэдэнтэй адил тоглож болно гэх ойлголтонд зөрүү гарсан.

Миний хувьд клубт өгч байсан мэдэгдлийн дагуу хоёрдугаар тойргоос өмнө легионер тамирчидтай адилхан нэрээ өгч, гэрээ хэлэлцээрийг хийсэн. Ингэхдээ Ховд “Ижил Алтайн Барс” клубт дуудагдан нэг удаа тоглосон. Тухайн тоглолтын дараа тоглох боломжгүй гэдэг хариуг холбооноос авсан. Энэ нь хувь хүн эсвэл миний харилцааны асуудал биш. Харин холбооноос манай ахлах дасгалжуулагч, менежерт монгол хүн легионер тамирчин гэж нэрлэгдэх боломжгүй гэдгийг хэлсэн. Ингэхээр яалт ч үгүй, монгол легионер гэдэг нэршил дээр ойлголцлын зөрүү гарчихлаа гэж ойлгоод байна” гэжээ.