Хүүхдийн эмч Навчаа: Витамин их ууснаар хүүхэд өндөр болох уу

Витаминууд хүүхдийг үнэхээр өндөр болгодог уу?

Витамин хүүхдийг үнэхээр өндөр болгодог уу гэвэл үгүй юм.

Хүүхэд хэрхэн өсдөг, түүний өсөлтөд юу, яаж нөлөөлдөг тухай анагаах ухаан хэдийнэ хангалттай судалсан ба үүн дотор өдөр бүр олон төрлийн витамин ууснаар таны хүүхэд өндөр болно, дархлааг дэмжинэ, хоолны дуршил нэмнэ гэсэн судалгааны үр дүн байдаггүй билээ. Хэрэв тийм байсан бол бид бүгд хүссэн өндөртөө хүрч, хүн бүр өндөр байх байсан бизээ. Харин энэ дунд тодорхой хэдэн эрдэсүүд болох кальци, д витамин зэрэг нь ясны бэхжилт, яс сийрэгжилтийн эсрэг нөлөө үзүүлснээр хүүхдийн өсөлтөнд дам нөлөөлдөг нь батлагдсан.

Тэгвэл юу хүүхдийн өсөлтөнд шууд нөлөөлдөг вэ?

1. Удамшил- Эцэг, эхээс хүүхэд дан ганц хэр өндөр болох тухай мэдээлэлээ өвлөөд зогсохгүй, үс, нүдний өнгө, ааш араншин, цаашлаад зарим өвчин эмгэг ч генээр удамшдаг. Аав, ээжийн өндрийг харьцуулан хүүхдийн боломжит өндрийг тооцоолох боломжтой ба энэ нь тухайн хүүхдийн хооллолт, хөдөлгөөн зэргээс шалтгаан 5-8см ээр хэлбэлзэх боломжтой. Иймд хүүхэд бүрийн өсөлт харилцан адилгүй байдаг.

2. Дааврууд- Тэр дундаа хүүхдийн амьдралын эхний 3 жилд бамбайн даавар, түүнээс хойш өсөлтийн даавар, өсвөр насанд бэлгийн дааврууд хүүхдийн өсөлтөнд хамгийн чухал нөлөө үзүүлнэ.

3. Хоол, тэжээлийн байдал- Хэдий чинээ олон төрлийн, тэжээллэг, насанд тохирох илчлэгийг тэнцвэртэйгээр өдөр бүр авна, төдий чинээ өсөлт эрчимжинэ. Харин илчлэгийг тэнцвэргүй, хэтрүүлэн авсанаас таргалалт үүсэн, хэвийн өсөлтөд саад учруулдаг. Хамгийн гол нь микро аминдэмүүд буюу витаминуудаас илүү макро амин дэм болох уураг /мах, самар, өндөг/, нүүрс ус /үр тариа/, сүү, сүүн бүтээгдэхүүн хүүхдийн өсөлтөд шаардлагатай суурь тэжээл юм.

4. Дасгал хөдөлгөөн, нойр- Өсөлтийн даавар нь хүүхэд унтсанаас 1 цагийн дараа хамгийн оргил хэмжээнд хүрч, дасгал хөдөлгөөн хийх үед эрчимтэй ялгардаг нь нотлогджээ. 1-2 нас- 11-14 цаг, Цэцэрлэгийн насныхан- 10-12 цаг, 10-16 насныхан- 8,5-9,5 цаг хоногт унтах хэрэгтэй.

Харин хүүхэд тураалтай байх, орчны сөрөг нөлөө, архаг эмгэг, удаан хугацааны даавар эмчилгээ хийлгэх зэрэг нь хэвийн өсөлтөд саад учруулдаг.

Сүүлийн үед өвчин эмгэгийн шалтгаангүйгээр өсөлтийн даавар тариулах тохиолдол олширсон. Хүүхдийн өсөлт нарийн зүй тогтолтой учир та яаран хүүхдээ өндөр болгох гэж өсөлтийн даавар тариулалгүй хүүхдийн эмчээс зөвлөгөө, мэдээлэл аваарай.