Сурагчийн үдийн хоолны мөнгийг 3000 төгрөг болгож нэмэгдүүлэх хүсэлт УИХ-аар хэлэлцэгдэнэ

Төрийн өмчийн сургуулиудын бага ангид суралцаж буй хүүхдүүдийн үдийн хоолны мөнгөнд төсвөөс жилд дунджаар  70 гаруй тэрбум төгрөг зарцуулдаг байна. Түүнчлэн улсын хэмжээнд энэ хичээлийн жилд 1-5 дугаар ангид 380 мянга гаруй хүүхэд суралцаж байна. 1-5 дугаар ангийн сурагчдын үдийн хоолонд дунджаар 1500 төгрөг зарцуулж байгаа юм. 

Боловсрол, Шинжлэх Ухааны Яамны мэдээлснээр өнгөрсөн хичээлийн жилд сурагчдын үдийн хоолонд 72 тэрбум төгрөг төсөвлөж байсан бол ирэх оны улсын төсөвт 74.5 тэрбум төгрөг болгон нэмэгдүүлэх санал гаргажээ. Ингэхдээ нэг хүүхдийн үдийн хоолны зардлыг хоёр дахин нэмэгдүүлэх буюу 3000 төгрөг болгохоор тус яамнаас санал гаргасан байна. Улсын Их Хуралд дэмжигдвэл  ирэх оноос эхлэн сурагчдад өгдөг хоолны мөнгө нэмэгдэж чанар бага ч атугай сайжрах юм.

Ирэх оны улсын төсвийн төслийг Сангийн яам УИХ-д өргөн барьснаар  эхний хэлэлцүүлэг өчигдөр болсон бөгөөд төсвийн төслийг УИХ-ын чуулганаар нийт гурван удаа хэлэлцэнэ.