БНСУ-ын парламентийн сонгуульд Ардчилсан нам 175 суудал авч ялалт байгуулжээ

БНСУ-ын 22 дахь удаагийн Их хурлын сонгууль 2024.04.10-ны өдөр болж өнгөрлөө.

Тус сонгуулийн саналын хувь 67%-д хүрсэн нь сүүлийн 32 жилийн туршид байгаагүй өндөр үзүүлэлт бөгөөд хамгийн их идэвх оролцоотой сонгууль болсон байна. Тэр хэмжээгээр өнөөгийн улс төрийн нөхцөл байдал болон сонгууль нь ард иргэдийн анхаарлын төвд байгаа нь харагдаж байлаа.

Сонгуулийн бүрэн үр дүн 11-ний өдрийн үдээс өмнө гарсан бөгөөд, нийт Үндэсний ассемблерын 300 суудлаас Ардчилсан нам жижиг эвслийн хамт 175 суудлыг авч ялалт байгуулж парламентад олонхи боллоо. Энэ нь 108 суудал авч удаалсан консерватив үзэл баримтлалтай эрх баригч нам (Юн Сол Ёр ерөнхийлөгчийн гарсан) болох Ард Түмний Хүч Намд хүнд цохилт боллоо.

Байгуулагдаад удаагүй байгаа Эх орныг сэргээн босгох нам 12 суудлыг, Шинэ шинэчлэлийн нам 3 суудлыг , Шинэ ирээдүй нам болон Дэвшилтэт нам тус бүр 1 мандат авлаа.

Энэ удаагийн сонгууль нь Өмнөд Солонгосын төрийн эрх баригчдын өнгөрсөн 2 жилийн ажлыг дүгнэсэн, нэгийг бодогдуулсан сонгууль болж өндөрлөлөө.

Ж.Нармандах