БНСУ-ЫН ХИЛЭЭР НЭВТРЭХ ХУУДАС/ARRIVAL CARD/-ЫГ 2025 ОНЫ 02 САРЫН 24 -НӨӨС ЦАХИМААР БҮРТГЭДЭГ БОЛЖЭЭ

Read Time:1 Minute, 56 Second

БНСУ-ЫН ХИЛЭЭР НЭВТРЭХ ХУУДАС/ARRIVAL CARD/-ыг 2025 оны 2 сарын 24 -өөс эхлэн цахимаар бөглөх шаардлагатай боллоо.

“Arrival Card” буюу “Хилээр нэвтрэх хуудас БНСУ-д зорчиж буй гадаад иргэдийн заавал бичих шаардлагатай бичиг баримт болдог. Энэ хуудсыг нисэх онгоцонд эсхүл нисэх буудлын “Бичиг баримт бичих” тусгай хэсгээс авч бөгөлдөг байсан бол 2025 оны 2 сарын 24 -өөс эхлэн хилээр орж ирэхээс 3 хоногийн өмнө урьдчилан цахимаар бөглөх шаардлагатай болох нээ.
🌐Цахим хаяг: www.e-arrivalcard.go.kr

“Arrival Card” буюу “Хилээр нэвтрэх хуудас” онлайнаар бөглөх явцад анхаарах зүйл:

1. ХАЯГ БУЮУ ОРШИН СУУХ ГАЗАР
БНСУ-ын визийн хүсэлт гаргахдаа мэдүүлсэн оршин суух газрын хаяг болон “Хилээр нэвтрэх хуудас”-т тэмдэглэсэн ХАЯГИЙН МЭДЭЭЛЭЛ ЗӨРӨХГҮЙ БАЙХ шаардлагатай. Хэрэв энэ мэдээлэл зөрсөн тохиолдолд хилээр нэвтрүүлэхгүй байх эрсдэлтэй болно.

• Зочид буудал, хүлээн авах хүний хаяг, түр оршин суух газар зэргийг ХАЯГ ТОДОРХОЙ, ГАРГАЦТАЙ бичих хэрэгтэй. Зочид буудалд байрлах бол буудлын нэр, хаяг заавал байх ёстой.

• Шаардлагатай тохиолдолд хилийн шалган нэвтрүүлэх албаны байцаагч БНСУ-д байрлах хаягийн үнэн зөвийг тодруулахын тулд “Хилээр нэвтрэх хуудас”-т бичсэн хаягийн утасны дугаартай холбогдож, таны байрлах хугацаа зэрэг мэдээллийг тодруулна. Иймд та зочид буудалд байрлах бол урьдчилгаа төлбөрөө төлж, захиалгаа заавал баталгаажуулаарай.

2. ХОЛБОО БАРИХ УТАСНЫ ДУГААР
Энэ хэсэгт та өөрийн эсхүл БНСУ-д буй танил /төрөл, садан/-ын эсхүл зочид буудлын утасны дугаар бичиж болно. Визийн хүсэлт гаргахдаа тэмдэглэсэн утасны дугаар болон “Хилээр нэвтрэх хуудас”-т бичсэн УТАСНЫ ДУГААР ЗӨРӨХГҮЙ байхыг анхаарна уу.
*Түүнчлэн, БНСУ-д зорчихоос өмнө “Хилээр нэвтрэх хуудас”-т бичсэн утасны дугаар эзэмшигч байгууллага болон хувь хүнтэй урьдчилан холбогдож, хил нэвтрэх цаг хугацаанд ГАР УТАС БИЕДЭЭ ОЙРХОН БАЙЛГАХ, хилийн шалган нэвтрүүлэх албаны байцаагч залгах үед Таны талаар тодорхой мэдээлэл өгөх боломжтой байхыг анхааруулах нь зүйтэй.

•Хилийн шалган нэвтрүүлэх албаны байцаагч “Хилээр нэвтрэх хуудас”-т бичсэн утасны дугаарт холбогдож, тантай хамааралтай эсэх, таны зорчих зорилго, оршин суух хугацаа, байрлах хаяг зэргийг тодруулах тул таны МЭДЭЭЛЭЛ ЗӨРӨХГҮЙ байх шаардлагатай.

3. ЗОРЧИХ ЗОРИЛГО
“Хилээр нэвтрэх хуудас”-т Аялал жуулчлал (Tourism), Ажил хэрэг бизнес (Business), Зочлох (Visiting), Хөдөлмөр эрхлэлт (Employment), Бусад гэсэн сонголт байдаг тул та энэ хэсгээс өөрийн зорчих ЗОРИЛГОО ЗӨВ СОНГОХ хэрэгтэй.

• БНСУ-ын Цагаачлалын хяналтын хуулийн дагуу хилийн шалган нэвтрүүлэх албаны байцаагч таны зорчих зорилго нь олгогдсон визийн статустай тохирч буй эсэхийг тодруулна. Иймд иргэн Та өөрийн визийн статусын дагуу зорчих зорилгоо нотолсон бичиг баримтыг биедээ авч явах нь зүйтэй.