БНСУ-ын тамирчидтай зураг авахуулсан Хойд Солонгосын тамирчдыг шийтгэжээ

2024-09-03

БНСУ-ын ширээний теннисний холимог хосын төрлийн тамирчид Им Жон Хун, Шин Ю Бин нарын Парисын Зуны Олимпын наадмын үеэр Хойд Солонгосын ширээний теннисний тамирчид болох Ким Кум Ён, Ри Жон Шик нартай ялалтын индэр дээр авахуулсан сэлфи өнгөрсөн сард олны анхаарлыг татсан билээ. Нийгмийн сүлжээнд тархсан уг сэлфи зураг олон зуун мянган лайк авч, Олимпын наадмын түүхэн дэх шилдэг мөчүүдийн нэг болсон юм.

Хойд Солонгосын мэдээ мэдээлэл нийтэлдэг Daily NK сайтад бичсэнээр Олимпын наадамд оролцсон Хойд Солонгосын тамирчид болон дасгалжуулагчид “үзэл суртлын шалгалт”-нд хамрагджээ. Олимпын наадам болохоос өмнө Хойд Солонгосын эрх баригчид тамирчдадаа Өмнөд Солонгосын болон бусад орны тамирчидтай харьцахгүй байхыг анхааруулдаг ба уг анхааруулгыг тамирчид ямар нэг байдлаар зөрчсөн тохиолдолд шийтгүүлдэг тухай Daily NK онцолжээ.

Ширээний теннисны холимог хосын төрөлд мөнгөн медаль хүртсэн Ри Жон Шик, Ким Кум Ён нар Пхеньяны “номер нэг дайсан” БНСУ-ын тамирчидтай инээмсэглэн зураг авахуулснаасаа болж Хойд Солонгосын эрх баригчдын анхааралд өртсөн ба Олимпод оролцсон Хойд Солонгосын бусад тамирчдын хамт нэг сарын турш үргэлжлэх “үзэл суртлын шалгалт”-нд хамрагджээ.

Korea Times сонинд бичсэнээр олон улсын тэмцээн уралдаанд оролцоод эх орондоо ирсэн Хойд Солонгосын тамирчид 3 үе шат бүхий “үзэл суртлын шалгалт”-нд хамрагддаг ба уг шалгалтын эцсийн шатанд тамирчид өөрийн багийн тамирчдын болон өөрийн гаргасан үйлдэлд дүн шинжилгээ хийж, шүүмжлэх ёстой аж. Уг шалгалтын үеэр тамирчид хийсэн үйлдэлдээ чин сэтгэлээсээ гэмшсэнээ баталж чадсанаар “улс төрийн болон захиргааны шийтгэл”-ээс зайлсхийж чаддаг гэжээ.

Хүний эрхийн хамгаалах Human Rights Watch байгууллагын мэдээлсэнээр энэ удаагийн Олимпын наадмаар медаль хүртээгүй тамирчдыг Хойд Солонгосын эрх баригчид Олимпод муу оролцсон гэсэн шалтгаанаар мөн шийтгэжээ.

Жишээ нь 2010 оны хөлбөмбөгийн ДАШТ-нд оролцох эрхээ авч чадаагүй Хойд Солонгосын тамирчдыг Пхеньяны үзэл суртлаас урвасан хэмээн 6 цагийн турш залхаан цээрлүүлж, багийн дасгалжуулагчийг барилгын талбайд албадан ажиллуулж байсан тухай Daily NK онцолжээ.

Эх сурвалж: The Guardian