Мьянмарын иргэний дайнаас болж газар хөдлөлтөд нэрвэгдэгсдэд тусламж очиж чадахгүй, халдлагад өртөж байна

Мьянмар улсад газар хөдөлсөн гамшгаас хойш долоо хоног орчмын хугацаанд нурангид дарагдаж нас барсан хүмүүсийн тоо 3,000 давжээ.

Харин гэмтэж бэртсэн хүмүүсийн тоо 4,500 болж нэмэгджээ. Мөн олон тооны хүн сураггүй алга болоод байна. Газар хөдлөлт болсон бүсэд олон улсын зүгээс тусламж илгээгээд байгаа боловч иргэний дайны нөхцөл байдлаас шалтгаалж тусламжийн цуваа зорьсон газартаа хүрч чадахгүй байна. Тиймээс Мьянмар улсын арми тусламжийн цувааг гамшгийн бүсэд хүргэхийн тулд 21 хоногийн хугацаанд гал зогсоох шийдвэр гаргалаа.

Түр гал зогсоох шийдвэр энэ сарын 2-оос 22-ыг хүртэл хэрэгжих юм байна.

Мьянмарын цэргийн хунтын эрх баригчид 2021 онд төрийн эргэлт хийж эрх мэдлийг гартаа оруулснаас хойш босогчдын зэвсэгт бүлгүүдтэй тулалдаж, иргэний дайн үргэлжилсээр буй.

Өчигдөр Мьянмарын газар хөдөлсөн бүсэд тусламж хүргэхээр явж байсан Хятадын Улаан загалмайн нийгэмлэгийн есөн машинтай цуваа дайралтад өртсөн бөгөө цуваа руу гал нээхэд азаар тусламжийн ажилтнууд гэмтэж бэртээгүй байна. Үүний дараа Мьянмарын арми гал зогсоохоор шийджээ.