Хэлэлцээр бүтэлгүйтэж газрын тосны үнэ нэмэгдлээ

Read Time:2 Minute, 5 Second

Газрын тосны үнэ нэмэгдлээ.
Иран Ормузын хоолойн нэвтрэлтийг хязгаарлаж, гал зогсоох хэлэлцээр дуусах дөхөв

Ням гарагт арилжаа эхлэхтэй зэрэгцэн Иран Ормузын хоолойг дахин хааж, энэхүү нарийн гарцаар нэвтрэхийг оролдсон хөлөг онгоцнууд руу довтолсны дараа газрын тосны үнэ өсөв.
Энэ нь дайн урт хугацаанд үргэлжилж болзошгүй гэсэн айдсыг дахин өдөөсөн байна.

Дэлхийн түүхий нефтийн тавны нэг нь дамжин өнгөрдөг чухал усан зам болох Ормузын хоолойгоор ихэнх хөлөг онгоц нэвтрэхийг Иран дахин хориглосны дараа ням гарагт газрын тосны үнэ өссөн юм.
Олон улсын жишиг болох Brent нефтийн үнэ 7 орчим хувиар өсч, нэг баррель нь 96.88 ам.долларт хүрэв. Өмнө нь баасан гарагт Иран хоолойг нээх гэж байна гэсэн мэдээ гарсны дараа үнэ 3-р сарын 10-наас хойших хамгийн доод түвшинд хүрч байсан. Харин АНУ-ын нефтийн үнэ мөн 7%-иар өсч 90.33 ам.доллар болсон байна.
Гэвч хоолой үнэхээр хэр нээлттэй байгаа, ямар хөлөг онгоцууд нэвтрэх боломжтой нь тодорхойгүй хэвээр байна.
Бямба гарагт Иран “итгэл эвдсэн” гэж АНУ-ыг буруутган Ормузын хоолойг дахин хааж байгаагаа мэдэгдсэн.
Хааснаа зарласны дараа Ираны зэвсэгт завьнууд хоолойгоор нэвтрэхийг оролдсон танкерууд руу гал нээсэн.
АНУ-ын Ерөнхийлөгч Дональд Трамп үүнийг гал зогсоох хэлэлцээрийг зөрчсөн үйлдэл гэж нэрлэж, “манай блокад аль хэдийн Ормузын хоолойг хаасан” гэж мэдэгдсэн.
Ням гарагт АНУ-ын цэргийн хүчин Ираны тугтай, тэнгисийн блокад зөрчихийг оролдсон хөлөг рүү “хэд хэдэн удаа” гал нээж, ойрын долоо хоногуудад дайн хурцдах эрсдэлийг нэмэгдүүлэв.

Эцэст нь АНУ, Ираны тугтай “Touska” нэртэй хөлгийг саатуулсан гэж АНУ-ын Төв командлал мэдээлжээ.
Ираны арми удахгүй хариу арга хэмжээ авч, “АНУ-ын зэвсэгт дээрэмд” хариу барина гэж төрийн хэвлэл мэдээллээр анхааруулсан байна.
Ням гарагт нэг ч танкер уг хоолойг нэвтрээгүй гэж хяналтын мэдээлэлд дурджээ.
Трамп АНУ-ын төлөөлөгчид Ирантай энхийн хэлэлцээ хийхээр Пакистан руу явж байгаа гэж мэдэгдсэн. Хэрэв лхагва гараг гэхэд тохиролцоонд хүрэхгүй бол гал зогсоох хэлэлцээрийг сунгахгүй гэж тэр анхааруулсан байна. Эх сурвалжийн мэдээлснээр Ираны хэлэлцээний баг мягмар гарагт Пакистанд очих ч Тегеран үүнийг албан ёсоор батлаагүй байна.
Иран болон АНУ “эцсийн тохиролцоонд хүрэхээс хол байгаа” гэж Ираны парламентын дарга, ахлах хэлэлцэгч Мохаммад Багер Галибаф ням гарагт төрийн телевизэд ярьжээ.

АНУ-д бензиний дундаж үнэ ням гарагт нэг галлон нь 4.05 ам.долларт хүрсэн бөгөөд 3 ам.доллараас доош буурах нь “ирэх жил хүртэл” боломжгүй байж магадгүй гэж Эрчим хүчний сайд Крис Райт CNN-д ярьсан. Гэхдээ “энэ оны сүүлээр” буурах боломжийг үгүйсгээгүй байна.
Үүний зэрэгцээ Dow индексийн фьючерс 0.91% буюу 451 нэгжээр унасан бол S&P 500 болон Nasdaq-ийн фьючерсүүд ойролцоогоор 0.8%-иар буурчээ.
Эх сурвалж: CNN news